الاقدار

على أنغام الموسيقى الصعيدي و هو يناظر سالم بتحد تجاهله الأخير فلم يتنحى عمار بل قام بإلقاء العصا أمامه في دعوة صريحة للنزال .. فلم يجد سالم مفرا من قبول دعوته و قام بإمساك العصا محاولا أن يجاريه مستخدما قوته البدنية و فطنته فأخذ الأخير يرسل ضربات قوية ردها سالم إليه بأقوى منها فتعالت الأصوات في مجلس النساء الذي ضم الثلاث عرائس في تجمع جديد من نوعه عليهم ولكنهم تأقلموا مع تلك العادات التي كانت لها رونقا مختلفا حتى أنهم اندمجوا بالرقص و الغناء و لكن فجأة صاحت إحدى الخادمات بأن هناك مبارزة في حلبة الرقص بين كل من سالم الوزان و عمار فدب الذعر بقلب فرح التي تذكرت حديثا دار في الصباح بينها وبين عمار

عودة لوقت سابق 
مبروك يا فرح.. 
أجابته بتحفظ 
شكرا يا عمار الله يبارك فيك
كانت ملامحه لا تفسر ولكن لهجته كان يشوبها السخرية حين قال 
يمكن يكون الحديت ده چاي متأخر بس لازمن يتجال.. فكرتي زين يا بت عمي حاسه إنك اختارتي صوح 
أجابته بقوة انبعثت من عينيها أولا 
انا مش حاسه أنا متأكدة إني اخترت صح ..
لونت السخرية ملامحه قبل أن يقول بتهكم
كنت متوكد إنك هتجولي أكده. بس لازمن انبهك أن سالم ده مش سهل واصل. و لا هو البطل اللي في خيالك .. ده جلبته شينه و جسوته ملهاش آخر.. 
قاطعته پغضب 
مالوش لازمه الكلام دا يا عمار..
له لازمه يا فرح .. و لازمن تسمعيه عشان ابجي خليت مسئوليتي جدام ربنا .. اللي أنت مفكراه عادل و مفيش منه رمى بت عمته لواحد أجل كلمة تتجال عليه أنه مش راچل .. دوجها المر .. اني عارف انك معتحبيش شيرين دي ولا اني كمان بس الحج لازمن يتجال.. أنه يعچل بفرحه منك ده مالوش معنى بالنسبالي غير أنه بيأدبها عشان اللي عملته زمان . هتجوليلي ايه اللي عملته هجولك أنهم كانوا مخطوبين و هيتچوزوا وهي اتعلجت بصاحبه و حبته 
قاطعته بحدة 
تبقى خاينه ..
عمار بتأكيد 
مجولناش حاچه .. عنديك حج . بس هو كان چبان و مهموش بت عمته و اللي هيحصلها من الچوازة دي و كل اللي كان في باله أنه يرد كرامته حتي لو هيدهوس على حريمه! 
انكمشت ملامحها بحيرة تجلت في نبرتها حين قالت 
انا مش فاهمه إنت تقصد إيه و يعني إيه رماها مش هي حبت واحد و اتجوزته هو ماله
اومأ برأسه فقد شعر بأن الحديث لا طائلة منه فقال باختصار 
الحكاية دي تبچي هي تحكيهالك انا نبهتك .. الراچل ده مش زي الصورة اللي رسمهاله في خيالك .. الف مبروك يا عروسه..
عودة للوقت الحالي ..
كانت ترتعب وهي

ترى العصا تدور هنا و هناك تخشى من حدوث أي شيء قد يعكر صفو هذه الأجواء ولكن فجأة وجدت ضحكة قويه شقت جوفها حين رأت مروان الذي جذب حمارا و أخذ يدور به في حلبة الرقص يمسك بيد لجامه وباليد الأخرى عصا وأخذ يدور بها حولهم فتعالت القهقهات من كل حدب و صوب فقد كانت حركاته مضحكة كثيرا و بعد أن انتهت تلك الرقصة اقترب عمار من أذن سالم قائلا بوعيد 
متخافش أكده احنا بنكرمو ضيوفنا في دارنا لكن تارنا بناخده في دارهم ..
لم يهتز سالم إنشا واحدا إنما قال بفظاظته المعهودة
مابحبش الرجالة لما ترغي كتير الرغي دا للحريم. وريني آخرك..
عمار بتوعد و نظرات حانقة
جريب .. هتشوفه جريب ..
يبقى مترغيش كتير.. اعمل وانت ساكت. وانا مستنيك..
أنهى كلماته و توجه يجلس بين أقاربه لحين انتهاء الحفل الذي دام لساعات بدت دهرا عليه فلم يعد يحتمل و توجه إلى عبدالحميد قائلا بخشونة
حاج عبد الحميد كفايه بقي احنا ورانا سفر .. و معاد الطيارة فاضل عليه ساعتين يدوب نلحق نجهز ..
مانت اللي مراضيش تسمع الكلام. جولتلك خليكوا اهنه الليلة انت الي راكب دماغك ..
سالم بصرامة
الموضوع دا منتهي . الجدال فيه مضيعه للوقت. وزي مانت اتمسكت بالأصول و العادات احنا كمان لينا اصولنا و عاداتنا .. 
عبد الحميد باستسلام 
اللي تشوفه.. اتفضل معايا انت و سليم ع المندرة علي ما العرايس يچهزوا .
أشار سالم الي سليم الذي تبعه إلى الداخل و ما هي إلا لحظات حتي جاءته أمينة تحمل محمود الذي لم تتركه يداها طوال الحفل تخشى عليه مما أخبرتها به ريتال و للحظة أرادت إخبار سالم بما حدث ولكنها لم ترد تخريب اليوم أكثر فيكفي ما حدث قبل أن يأتوا إلى هنا فاقتربت منه تحتضنه بقوة وهي تقول بجانب أذنه 
ربنا يسعد قلبك يا ابني .. عروستك زي القمر ..
احتضنها سالم بقوة قبل أن يقول بحنان 
ربنا يحفظك لينا يا ست الكل ..
قبل كفها باحترام و كذلك فعل سليم الذي قال بمرح
إنت نستيني يا حاجة ولا إيه مانا بردو عريس ولا سالم واكل الجو ..
ابتسمت أمينة بحب انبعث من نظراتها أولا قبل أن تترجمه شفتيها